මතකද?

ලුතිනන් කර්නල් ලලිත් ජයසිංහ, WWV, RWP, RSP

රට ත්‍රස්තවාදීන්ගෙන් බේරා ගැනීමේ සටනේදී සතුරු බල ප්‍රදේශ ඇතුළටම ගොස් විශිෂ්ඨ දස්කම් දක්වපු වීරෝදාර ශ්‍රී ලාංකීය පුත්‍රයෙක් අපට අහිමිවී ගොස් හෙටට අවුරුද්දක් පිරෙනව.

ඒ වීර වික්‍රම විභූෂණ සම්මානයෙන් දෙවරක්ම ඇගයීමට පාත්‍රවූ විශේෂ බලකායේ ලුතිනන් කර්නල් ලලිත් ජයසිංහ රණවිරුවා.

අපි හැමදෙනාම ශ්‍රී ලංකා මාතාවගේ ඒ ශ්‍රේෂ්ඨ පුත්‍රයාට නිවන් සුව ප්‍රාර්ථනා කරමු.

මට මතකයි කොහේ හරි තිබුන කියමනක් “හමුදා සෙබලෙකුට ජාතික කොඩියත් එක්ක තියෙන්නෙ පුදුම බැඳීමක්. තමුන් යන තැන කොඩිය ඔසවන්න ඕනෙ; නැත්නම් කොඩියෙ එතිල ගෙදර යන්න ඕනෙ කියල.”

ලලිත් ජයසිංහ කියන්නෙ ගිය ගිය තැන් සිංහ කොඩිය ලෙලදෙන්න සලස්සපු නියම සෙබලෙක්.

ලලිත් ජයසිංහ නම් වූ ශ්‍රේෂ්ඨ ශ්‍රී ලාංකීය පුත්‍රයාට දියකැට පහණේ උත්තමාචාරය මෙසේ පිරිනමන වගයි……..

Advertisements

රටේ නම කෑම

මේ blog post එකට දාන්න හොඳ මාතෘකාවක් කොච්චර කල්පනා කරත් හිතා ගන්න බැරිවුනා. අන්තිමට දැම්ම මාතෘකාව කොච්චර ගැලපෙනවද නම් දන්නෙ නැහැ.

ඒත් වැදගත් වෙන්නෙ ලියන දේ කියල තමයි මමනම් හිතන්නෙ.

පොඩිකාලෙ ඉඳල අපිට උගන්වන දෙයක් තමයි තමුන්ගෙ රට ගැන ඒ කියන්නෙ ලංකාව ගැන ආඩම්බර වෙන්න කියල. ඉස්සර කාලෙ අපේ රටේ මෙහෙමයි…අරව තිබුන…මේව තිබුන…යෝධයො හිටිය…වගේ ගොඩක් කතා පොඩි කාලෙ ඉඳල උගන්වනව.

ඒත් ඕකෙ අපි නොහිතන පැත්තක් තියෙනව. ඇත්තටම බැළුවහම අපි ආඩම්බර වෙන්නෙ අපේ මුතුන්මිත්තන්ගෙ අතීතය ගැන නේද? අපිට අපේ පරපුරේ අතීතය ගැන හරි වර්තමානය ගැන හරි ආඩම්බරයෙන් කතාකරන්න පුළුවන්ද?

මෑත කාලයේදී ත්‍රස්තවාදීන් විනාශකිරීම හැරුනහම අපිට අපේ රට ගැන ආඩම්බර වෙන්න පුළුවන් මොනව ගැනද?

අපේ රටින් අනෙක් රටවලට අනවසරයෙන් පළායන සංක්‍රමණිකයින් ගැනද? එහෙම නැත්නම් අපේ රටේ මානව හිමිකම් කඩවෙනව කිය කියා ලෝකයට කෑගහන අය ගැනද?

මේ දේවල් ගැන ටිකක් අවදානයෙන් බැළුවහම පේන්නෙ අපේ රටේ නම කැත කරන්න විශාල දයකත්වයක් දෙන්නෙ අපේම රටේ මිනිස්සු වීම.

මට මේ blog post එක ලියන්න අදහස පහළ වුනෙත් මේ වගේ අපේ රටේම අය කරන වැඩක් දැකල.

ලංකාවෙ ඉඳන් ගොඩක් අය සිංගප්පූරුවට කෙටි සංචාර සඳහා එනව. මෙහෙම ගොඩක් අය එන්නෙ තම තමුන්ගෙ ව්‍යාපාර සඳහා අවශ්‍ය බඩු අරගෙන එන්න. මෙහෙම එන අයට තියෙන ප්‍රධාන ප්‍රශ්නයක් තමයි තමුන්ට ගුවන් යානයේ අරගෙන යන්න පුළුවන් බර ප්‍රමාණයට වඩා වැඩියෙන් බඩු තිබීම.
ඒ ප්‍රශ්නයට උදවු කරන්නත් අපේම රටේ කට්ටියක් සිංගප්පූරුවෙ ගුවන් තොටුපොලේ ඉන්නව. මේ අය කරන්නෙ ඔහොම ඉන්න කට්ටියගෙන් සල්ලි අරගෙන ලංකාව බලා එන ගුවන් යානයට Check-In වෙන අනෙක් අයට අර කට්ටියගෙ බඩු දීල අරගෙන යන්න කියන එක. කවුරුහරි ඒක ප්‍රතික්ෂේප කලොත් සමහර වෙලාවට අසභ්‍ය වචනයෙන් බණින වෙලාවලුත් තියෙනව. මේ ළඟදි දවසක ඔහොම ප්‍රශ්නයකදි රණ්ඩුවකුත් ගියාලු.

කවුරුහරි කැමැත්තෙන් උදවුවක් වශයෙන් බඩු ටිකක් අරගෙන යන එක වෙනම දෙයක්. ඒත් තමුන් අකමැතිනම් ප්‍රතික්ශේප කරන්න අයිතිය තියෙනව, මොකද කවුද දන්නෙ නීති විරෝධී බඩු දෙනවද කියල අරගෙන යන්න.

ඒත් ඔහොම වෙන කාලගෝට්ටි නිසා වෙන්නෙ ලෝකයක් ඉදිරියේ රටේ නම කැතවෙන එක.

බල්ල මොන වර්ගෙද?…… පිලිපීනෙ

මේක අපිත් එක්ක සිංගප්පූරුවෙ එකට වැඩකරන සහෘදයෙකුට ඊයෙ පෙරේද වෙච්ච ඇබැද්දියක්. අපේ එකෙක් විපතට පත්වුනහම හිනා වෙන්න හොඳනැති වුනත් මේකනම් ඉබේම හිනා යන වැඩක්.

මේකෙ කතානායකය තමුන්ගෙ නමේ හැටියටම සැපසම්පත් වලින් පිරිච්ච විනෝද බර ජීවිතයක් ගත කරපු එකෙක්. ලංකාවෙදිත් එහෙමයි; සිංගප්පූරුවෙදිත් එහෙමයි. කොල්ල හැබැයි ටිකක් මනමාලය. ඒ කිව්වෙ ස්ත්‍රී පාර්ශවයට ඇල්ම බැල්ම දාගෙන ඉන්න එකෙක්. හැබැයි හිත හොඳ එකා.

ඔන්න ඊයෙ පෙරේද දවසක dial එක rock වෙන්න ඇඳල deck shoes දාගෙන කොහෙද ගමනක් ගිහින්. ආපහු එනකොට ටිකක් කරුවල වැටිල.

කතාව එතැන් සිට:

ඈත රූප ශ්‍රීයෙන් බැබළෙන ලලනාවියකි;
මෑත කළු මහත විශාල උදරයක් හිමි මහෝදරයෙකි.

ඈත විලවුන් සුවඳ දසත විසිරේ;
මෑත දහඩිය දුගඳ සැමත පැතිරේ.

සිදුවුයේ අපේක්ෂා කල දෙයමය; දෙදෙනාගේ නෙතට නෙත යාවිය.

මෑත දුටු දසුනෙන් හටගත් ප්‍රේමයෙන් මුසපත් වූ යෞවනයෙකි;
ඈත දුටු දසුනෙන් තැති ගැන්මට ලක්වූ යෞවනියකි.

මෑත තව තවත් ඈ වෙත ළං වෙනු පිණිස කඩිනමින් පිය නඟන තරුණයායි;
ඈත තව තවත් ඔහුගෙන් දුරස් වනු කඩිනමින් පිය නඟන තරුණියයි.

කෙසේ හෝ ජයග්‍රහණය තරුණයාට හිමි වේ. උද්දාමයට පත් ඔහු “Hi, What is your name? “.
අහෝ අහඹුවකි. තරුණිය වෙනුවට පිළිතුරු දෙන්නේ ඇගේ සුරතල් බල්ලායි.

“බවු, වවු; ග්ර්ර්ර්……….”
“අම්මෝ…….. බේරගනියෝ… බල්ල කෑවෝ….”

ඈත වෛද්‍ය සායනයේ රෝගීන් සුවපත් කරන වෙදැඳුරායි;
මෑත බල්ලා සපා කෑමෙන් පීඩාවට පත්වු ප්‍රේමවන්තයායි.

ඈත රෝගීන් සුවපත් කිරීමට “ඉන්ජෙක්ෂන්” දෙන දොස්තරයි;
මෑත “ඉන්ජෙක්ෂන්” ගහගන්න මට බැරියැයි විලාප දෙන මහෝදරයි.

දෙදෙනා කෙසේ හෝ හමුවිය.
රෝගියා අසහනයෙනි;
වෙදැඳුරා සහනය දෙනු පිණිසය..

“ඔයාව කාපු බල්ල මොන වර්ගෙද?”
“පිලිපීනෙ”

පසු ලිවීම: සත්‍ය සිද්ධියට අලංකෘත එක්කොට ලියන ලදී …….

A’Famosa Water World

මම ඉස්සෙල්ල ලිපියක සඳහන් කළා වගේ ලංකාවෙ ඉඳන් KL එන කට්ටියට වැඩිපුර දවස් ටිකක් ඉන්න පුළුවන් නම් මලක්කාව පැත්තෙත් ආවොත් තවත් ගොඩක් දේවල් බලන්න පුළුවන්.

ළඟින්ම තියෙන්නෙ High-Speed Slide එක.

එහෙම මලක්කා එනවනම් අනිවාර්යයෙන්ම යන්න ඕනෙ තැනක් තමයි A’ Famosa Water World කියන්නෙ. මම එහෙම කියන්නෙ මොකද කියල ඒකට ගියහම කට්ටියට තේරෙයි. A’ Famosa Water World කියන්නෙ A’ Famosa Resort කියන හෝටලයෙම කොටසක් හරියට GENTING Theme Park එක වගේ. මේක සම්පූර්ණයෙන්ම වෙන්වෙලා තියෙන්නෙ ජල ක්‍රීඩා වළට. අපිනම් මේකට ගිහින් නියම ආතල් එකක් ගත්ත.

සමහර ක්‍රීඩා තියෙනව මුල්ම සැරේට යනකොට ඇත්තටම මේකෙ යනවද නැද්ද කියල දෙපාරක් නෙමෙයි විසි තිස් පාරක් හිතන්න වෙන. ඒව එච්චරටම ලොමු දැහැ ගැන්වෙන ක්‍රීඩා. ඒත් පස්සෙ පස්සෙ තව තවත් යන්න ඕනෙ. අපිත් එක්ක ගිය කට්ටියෙන් සමහරු ඔය කියන ක්‍රීඩා වලට ගියෙ නැහැ බයේ. එතන තියෙන High-Speed Slide දෙක තමයි ඔයිනුත් නියම fun එක. තට්ටු 7ක උසක ඉඳන් පහලට ලිස්සල එනකොට කොහොමද? මරු නේද? ඔය slides යන්න කියල උඩට නැඟල, ඒත් උඩට ගියාට පස්සෙ ඕකේ යන්න බැරුව බයේ ගැහි ගැහී කීදෙනෙක් ආපහු එනවද කියල දන්නවද? 😀

එකක් කියන්න ඕනෙ මේකෙ තියෙන ක්‍රීඩා කොච්චර ත්‍රාසජනක වුනත් දීල තියෙන උපදෙස් පිළිපදිනවනම් ආරක්ෂාව ගැන බයවෙන්න ඕනෙ නැහැ. මෙහෙ යන්න පුළුවන් ලේසිම සහ පහසුම ක්‍රමේ තමයි මලක්කාවෙන් ටැක්සියක් ගන්න එක. බස් එකේ යන එක ගොඩක් කට්ටක් කන්න වෙන වැඩක්.

කට්ටිය A’ Famosa Water World ගිහින් “බය යනු කුමක්ද?” කියල තේරුම් ගන්න.

Good Luck