තේ

අප්පෝ හෙණ කාලෙකින්නෙ බ්ලොග් එක පැත්තෙ ඇවිල්ල තියෙන්නෙ. ලියන්න මාතෘකා තිබුනත් ලියන්න එච්චර ගෝ එකක් නැහැ වගේ. ඒත් ඉතින් අපේ කට්ටිය ලියන ඒවනම් මග අරින්නෙ නැතුව කියවනව.

Teh Tarik හදන හැටි

ඔන්න කාලෙකට පස්සෙ ලියන්නෙ බීමක් ගැන. තේ කිව්වහම ඉතින් ලංකාවෙ කවුරුත් දිනපතා බොන දෙයක්නෙ. සමහරුන්ටනම් දවසකට 3න් 4 වතාවක් තේ බොන්න ඕනෙනෙ.

ලංකාවෙ අපි බොන්නෙ එක්කො ප්ලේන් ටී, නැත්නම් ටී (කිරි තේ). ඔය අතරෙ ඉතින් ඉඟුරු දාල හදන ප්ලේන් ටීත් නැතුවම නෙමෙයි. ඔරිජිනල් තේ; ඒ කියන්නෙ ප්ලේන් ටී වලට “ප්ලේන්” කියල විශේෂණයක් දාන්නෙත් කිරි තේ වලට නිකම්ම නිකං “ටී” කියන්නෙත් ඇයි කියන එක මට පොඩි කාලෙ ඉඳන් තියෙන ප්‍රශ්නයක්! තවමත් ඒකට උත්තරේ දන්නෙ නැහැ. (දන්න කෙනෙක් ඉන්නවනම් කියන්න)

මැලේ භාෂාවෙන් අපි ප්ලේන් ටී කියන සීනි විතරක් දාල හදන තේ වලට කියන්නෙ තේ-ඕ ( teh-o) කියල. හොඳට පෙණ එන්න කීප පාරක් යාරයක් දෙකක් ඇදල හදන කිරි තේ වලට කියන්නෙ තේ-තරික් ( teh-tarik ) කියල. ( මැලේ භාෂාවෙන් tarik කියන්නෙ  අදිනවට ) හරියට ලංකාවෙ සරුවත් හදනව වගේ. මම අහල තියෙන විදිහට ලංකාවෙ දිගම සරුවත් දාන්නේ ඉස්සර යාපනේ හිටපු සරුවත් හදපු කට්ටියලු!

Green Tea

ඔය වර්ග ඔක්කොම හදන්නේ Black Tea කියල කියන කළු තේ වලින්නෙ. ඔය Black Tea වලට අමතරව Green Tea (කොළ තේ), Yellow Tea (කහ තේ), White Tea  (සුදු තේ) කියල එක එක වර්ග වල තේ තියෙනව. ඒත් මම දන්න විදිහට Black Tea වලින් දාන සෙල්ලං ඔය අනෙක් තේ වලින් දාන්න බැහැ. Green Tea වලට පිළිකා හැදෙන එක නවත්තන්න පුළුවන් කියල කියමනක් තියෙනව අහල තියෙනව. මම ඉස්සෙල්ල වැඩ කරපු තැනක මැනේජර් කෙනෙක් බිව්වෙම Green Tea; ඒ ශරීර සෞඛ්‍යයට හොඳයි කියල. ඒත් හිනා යන දේ තමයි මිනිහ දවසකට සිගරට් පැකට් 1 1/2ක් විතර බොනව.

චීන Jasmine Tea

ඔය කිව්ව වර්ග වලට අමතරව චීන ,ජපන් කට්ටිය අතර ජනප්‍රිය තව තේ වර්ගයක් තියෙනව  Jasmine Tea කියල. දන්න විදිහට නම් Jasmine Tea කියන්නෙ Green Tea වලට සමන්පිච්ච මල් කුඩු දාල තමයි තියෙන්නෙ. Jasmine Tea එකක් හැදුවහම පැත්තම සුවඳයි; හැබැයි මම දවසක්  try කරල බැළුව කටේ තියන්නවත් බැහැ! මට ඒ රස එච්චරම දිරවන්නෙ නැහැ.

තේ කිව්වහම එක පාරටම අපිට මතක් වෙන්නෙ තේ කුඩු නෙ. හැබැයි ලෝකෙට තේ බොන එක හඳුන්වල දුන්නයි කියල විශ්වාස කරන චීන අය තේ  compress (සම්පීඩනය) කරල තේ කැට හදනව. බොන්න ඕනෙ උනහම සුප් කැට වලින් සුප් හදනව වගේ උණු වතුර එකකට දාල බොනව. චීන්නුන්ගෙ තේ වර්ග ගොඩක් තියෙනව. උපාධියක් ගන්න තරම් ඉගෙන ගන්න දේවල් චීන තේ ගැන තියෙනව. ගොඩක් චීන අය සීනි, අරව මේව මොනවත් දාන්නෙ නැතුව නිකම්ම නිකන් තේ විතරක් බොන්නත් පුරුදු වෙලා තියෙනව.

Ice Lemon Tea

සිංගප්පූරුවට ආවට පස්සෙ මම බොන්න පුරුදු වෙච්ච දෙයක් තමයි  Ice Lemon Tea කියන්නෙ. සාමාන්‍යයෙන් අපි හදන ප්ලේන් ටී එකට ලෙමන් යුෂ ටිකක් මිශ්‍ර කරල ශීතකරණයෙ දාල තියල පිලිගන්වනකොට අයිස් කැට ටිකක් දාල පිළිගැන්නුවහම ඒක Ice Lemon Tea! ඕකෙම තවත් version ටිකක් තියෙනව Ice Peach Tea, Ice Apple Tea කියල. ඔය කියන ඒවත් Ice Lemon Tea වගේමයි. වෙනස මිශ්‍ර කරන පළතුරු යුෂ වර්ගය මොකක්ද කියන එකයි.

රටින් රටට වෙස් මාරු කරන “අලි බබා”!

අලි බබා කිව්වහම කට්ටියට එක පාරටම මතකයට එන්නෙ “අලි බබා සහ හොරු හතලිහ” නේද? ඉරාකයේ බැග්ඩෑඩ් නගරය කේන්ද්‍ර කරගෙන ලියවිච්ච මේ අරබි කතාව සමහරුන්ට අනුව නම් සුප්‍රසිද්ධ අරාබි නිසොල්ලාසයෙ එන කතාවක්. සමහරුන්ට නම් පොඩි ලමයින්ට කියල දෙන නිකංම නිකං අරාබි කතාවක්. ඒ කොහොම උනත් කතාවල හැටියට නම් අලි බබා කියන්නෙ මිනිහෙක්නෙ.

අරාබි කතාවල එහෙම උනාට ලංකාවෙදි සත්තු වත්ත, පින්නවල අලි අනාථාගාරය, උඩවලවෙ ඇත් අතුරු සෙවන වගෙ තැන් වලට පොඩි ළමයින්ව එක්කගෙන ගියහම අලි බබාල ගොඩක් පෙන්නල එන්න පුළුවන්!

ඔය “අලි බබා” සිංගප්පූරුවට ආවහම නම් අමු හොරෙක් වෙනව! සිංගප්පූරුවෙ කට්ටිය පාවිච්චි කරන  singlish වලින් “අලි බබා” කියන්නෙ හොරාට, එහෙම නැත්නම් කට්ට කෛරාටික එක්කෙනෙක්ට.

පසු ලිවීම :- අන්තර්ජාලයෙ ඉන්න අලි බබා නම් නොයෙකුත් බඩු විකුණන online – තැරව්කාරයෙක්!

සිංගප්පූරුවේ “දත් ගැලවිල්ල”!

ඔන්න ආපහු කාලෙකට පස්සෙ බ්ලොග් එක පැත්තෙ ආව.
මේක මට ඊයෙ වෙච්ච සිද්ධියක්.

දත් දොස්තරල කියනව වගේ දවසකට දෙපාරක් දත් මදින හින්දත්, හැම දතකටම ලේසියෙන් ලඟාවෙන්න පුළුවන් නැමි 3නේ දත් බුරුසුවක් පාවිච්චි කරන හින්දත්, ෆ්ලෝරයිඩ් සහ කරාබු නැටි තෙල් තියෙන දන්තාලේපයක් පාවිච්චි කරන හින්දත් ඔන්න මගෙ දතක් “පණුවො කෑව”.

ටික දවසක් ඉවසල ඉන්න බැරි තැන ඊයෙ නිවාඩුවක් දාල මම ගියා සිංගප්පූරුවේ දත් දොස්තර කෙනෙක් මුණ ගැහෙන්න. මෙහෙ ඉතින් ඕනෙ දෙයක “කැටයම” තියෙනවනෙ. Dental Clinic එක Full AC! ගිය ගමන් දුන්න form එකක් ඉපදිච්ච වෙලාවෙ ඉඳන් සෞඛ්‍ය ඉතිහාසය අහල. ඒකත් පිරෙව්ව කියමුකො.

ටික වෙලාවකින් දොස්තර කතා කලා. ඇතුලට ගියහම වාඩි වෙන්න කියල ඇහුව මොකක්ද ප්‍රශ්නෙ කියල. මමත් කිව්ව මෙන්න මෙහෙමයි; මට හිතෙන විදිහට මගෙ දකුණු හක්කෙ උඩු ඇන්දෙ දතක් දිරල කියල. දොස්තර කිව්ව මුලින්ම X-ray එකක් අරගෙන බලමු කියල. ඒකට ඩොලර් 20ක් යනවලු. ඉතින් මමත් “හා” කිව්ව. හා කිව්වට ඉතින් හිත නිකන් exchange control center එකක් වගේ පට පට ගාල ඩොලර් රුපියල් වලට හරවනව. ඩොලර් 20 ක් කියන්නෙ රුපියල් 1600ක් විතර. ඒත් ඉතින් මොනව කොරන්නද? මේ සිංගප්පූරුවනෙ! X-ray එක ගත්තට පස්සෙ ඒක බලල කියනව normal filling එකකින් වැඩේ ගොඩ දාගන්න පුළුවන් වෙයි වගේ කියල. ඒකට ඩොලර් 60යි! (රුපියල් වලින් 4800ක් විතර ) ඇති ඔයින් බේරුනොත්!

ඔන්න ඉතින් දත පුරවන්න පටන් ගත්ත. ටික වෙලාවකින් දොස්තර කියනව දතේ දිරුම ගොඩක් ඇතුලට තියෙනව එක්කො nerve filling එකක් කරන්න ඕනෙ, නැත්නම් දත ගලවන්න ඕනෙ කියල. දැන් ඉතින් මක්කැයි කොරන්නෙ?

දත ගලවනවනම් යන්නෙ ඩොලර් 30යි ලු. ඒත් දත ගොඩ දාගන්න පුළුවන් තත්ත්වයෙ එකක් හින්ද එයානම් කියන්නෙ nerve filling එකක් කරගන්න කියලලු. හැබැයි ඒකට ඩොලර් 600ක් විතරලු, ඊට පස්සෙ තව crowning කියල එකක් කොරන්න තව ඩොලර් 500ක් විතර යනවලු.

දැන් දොස්තර කියනව හිතල බලල කියන්නලු මොකක්ද කරන්නෙ කියල. මිනිහ මාව මාර උගුලක තමයි දැම්මෙ! ගොඩ දාගන්න පුලුවන් දතක් හින්ද ගලවන්නත් ලෝබයි; ඒත් ඉතින් ඩොලර් 1100ක් දතකට වියදම් කරන්න?

ඔය වෙලාවෙ ඉතින් පූරුවෙ වාසනාවකට maxa idea එකක් ආව. මම කිව්ව මම ආපහු ලංකාවට යනව; ලංකාවෙ nerve filling එකක් කරන්න උපරිම යන්නෙ ඩොලර් 100ක් විතර; ඒක නිසා ඒ වෙනකම් මට  temporary filling එකක් දාල දෙන්න කියල. වැඩේ ගොඩ!

දොස්තරත් ඉතින් (බැහැ කියන්න බැරි නිසා) “හා” කියල දත පුරවල දුන්න. 😀 කොහොම හරි අන්තිමට ඔක්කෝටම ඩොලර් 90ක් විතර ගියා. ඔයින් ගියා ඇති. උන්න හැටියට මළා මදැයි!

Full අබ්ලික් වෙච්ච වෙලාවෙ අරවගේ idea එකක් ආව එකට දහස්වාරයක් ස්තූති කර කර මමත් ආපහු ආව.

ඔන්න ඔහොමයි සිංගප්පූරුවෙ “දත් ගැලවිල්ල”!

Raat Kali Ek Khwaab Mein Aayi – සිහිනයකදී සමන් කැකුලක්ව පැමිණ

බ්ලොග් එක පැත්තෙ ආවෙ ගොඩ කාලෙකින්. ලියන්න මාතෘකා කීපයක් හිතට ආවත් හිතට එච්චර ෆිට් එකක් තිබුනෙ නැහැ. ඒත් අපේ කට්ටියගෙ බ්ලොග් ටික නම් කියෙව්ව. ඒ අතරෙ ඕන් කට්ටිය බ්ලොග් මැරතන් එකකුත් ලෑස්ති කරල කියන්නෙ. මගෙත් idea එකක් තියෙනව ඕකට සෙට් වෙන්න. බලමු ඉතින් එන හැටියට තමයි.

දැන් මාතෘකාවට බහිමු. මාතෘකාවෙ තියෙන්නෙ මම ගොඩක්ම කැමති හින්දි සිංදුවක්. මේක 1971 දි තිරගත වුනු Buddha Mil Gaya කියන හින්දි චිත්‍රපටියට මුලින්ම ගායනා කරල තියෙන්නෙ අග්‍රගණ්‍ය ගායකයෙක් වෙච්ච කිශෝර් කුමාර්; මුල් ගීතය වෙච්ච මේක රචනා කරල තියෙන්නෙ මජ්රු සුල්තාන්පුරි; සංගීතවත් කරල තියෙන්නෙ රාහුල් දේව් බර්මාන්.

ඊට පස්සෙ මේ සිංදුවෙ 2nd Version එක 2002 දි Dil Vil Pyaar Vyaar කියන හින්දි චිත්‍රපටියට කුමාර් සානු ගායනා කරනව.

ඊටත් පස්සෙ ඉන්දියාවෙ දැනට ඉන්න radical විදිහට පරණ සිංදු re-mix කරන music band එකක් වෙන Instant Karma කියන අය 2006 දි මේ සිංදුවෙ මෙච්චර කාලෙකට ආව හොඳම version එක ඒ අයගෙ 4 වෙනි album එක වෙන Dance Masti Forever කියන album එකේදි Raat Kali – The Midnight Lady Mix කියල එළියට දෙනව.

අමාරුවෙන් අමාරුවෙන් මේ සිංදුවෙ තේරුමත් ගැටගහගත්ත ඕං…

(ඈ) සිහිනයකදී සමන් කැකුලක්ව පැමිණ පසුව මල් මාලයක් විය,
පසුදා හිමිදිරියේදි සිහිනෙන් අවදිවත්ම ඇගේ නෙත් මගේ නෙත් හා යාවිය.

ඔබට කැමතිනම් මෙය මගේ ආදරයයැයි වටහාගන්න, නැත්නම් එයට හිනා වෙන්න; එයට කම් නැත.
මට මේ කුමක් වී ඇත්දැයි වටහා ගැනීමට නොහැක; ඔබටවත් වැටහෙන්නේනම් කරුණාකර මට පවසන්න.
මේ දෙරණ මත ඔබ තබන පියවරක් පියවරක් පාසා මගේ හදවත සලිත වෙන්නේ ඇයි?

අඳුන් ගැල්වූ ඔබේ නෙතු සඟල මට හැඟෙන්නේ මේඝ වලාවක් මෙනි,
රන්වන් පැහැ ගැන්වුනු ඔබේ මුහුණ උදෑසන  හිරු කිරණ මෙන් ප්‍රබෝධමත්ය.
ඔබේ ඔය වත කමල මගේ හදවතේ පිපුණ දා සිට මසිත අලංකාර මල් යායක් වී සුවඳ හමයි..

කොතෙකුත් සුන්දර ලලනාවන් මා දැක ඇතිමුත් ඔබගේ රූපශ්‍රීය හමුවේ ඔවුන් පරාදය.
මගේ දෑත් යුගල මතට ඔබව රැගෙන යෑම එක වරක් නොව කීපවාරක් මා දුටු සිහිනයකි.

(ඈ) සිහිනයකදී සමන් කැකුලක්ව පැමිණ පසුව මල් මාලයක් විය……….

එහෙනම් කට්ටිය සිංදුවෙ Version 3 ම අහමු!

මෙන්න Original Version

මෙන්න 2nd Version

මෙන්න මම කැමතිම 3rd Version එක

සුලෝහිත සංග්‍රාමය

අපි ඉස්කෝළෙ යන දවස්වල Big Match එක තියෙන දවස් කියන්නෙ නියම fun කාලෙ. උපරිම Fun තමයි. ලංකාවෙ ඉස්කෝල අතර තියෙන Big Matches වලින් අපේ ඉස්කෝළ 2කේ Big Match එක ගොඩක් වෙනස්. ඒ වෙනසට ප්‍රධානම හේතුව තමයි ඉස්කෝළ 2 අතර තියෙන fit එක. කොහේ ගියත් ඉස්කෝළ 2 එකට.

සාමාන්‍යයෙන් School Bus එකක් දාන්නෙ එක ඉස්කෝළෙකටනෙ; ඒත් ආනන්දෙටයි නාලන්දෙටයි තියෙන්න එක School Bus එකක්. Big Match එක කාලෙට ඒ බස් එක වැහෙන්න ඉස්කෝළ දෙකේම කොඩි දාගෙන යනව වෙනසක් නැතුව. කොළු කමට දවස්වල කරන අනෙක් පිස්සු විකාර වැඩත් ඉතින් එකටම තමයි.

Match එක දවසටත් තරඟයෙ ජය පැරදුම මොකක් වුනත් දෙගොල්ලොම සින්දු කියල නටල තමයි ඉන්නෙ. ආනන්ද-නාලන්දා Big Match එකේ කවදාවත් ඉස්කෝල දෙක අතර රණ්ඩුවක් වෙලා තියෙනව කියල මමනම් මෙච්චර කාලෙකට අහල නැහැ. Big Match කාලෙට නෙමෙයි අනෙක් කාල වලදිත් එහෙම්මම තමයි.

අපේ ඉස්කෝළ දෙකේ අයට Big Match එක කියන්නෙ එකට එකතු වෙන්න හම්බ වෙන , අනෙක් ඉස්කෝලෙට ගිහින් යාළුවො හම්බවෙන්න ලැබෙන කාලයක්. ඔය කාලෙට තියෙන තව Matches තියෙනව. ඉස්කෝල 2කේ සර්ල ගහන ක්‍රිකට් Match එක, මැඩම්ල ගහන  Netball match එක වගේ. ඔය ටිකත් ඉතින් උපරිම fun එකක් ගන්න අවස්ථා තමයි.

මම මේ සටහන තියන්න හිතුවෙ 81 වෙනි සුලෝහිත සංග්‍රාමය අද කොළඹ සිංහල ක්‍රීඩා සංගම් පිටියෙදි ආරම්භ වෙන නිසා.

අපේ ඉස්කෝළ 2කේ උදවිය ඉස්කෝළ පටන්ගත්ත කාලෙ ඉඳල තියාගෙන ආපු, අපෙ කාලෙදි අපිත් රැකගත්ත, දැනටත් පවතින මේ ආනන්ද – නාලන්දා fit එක හෙටත්, මතුවටත්, හැමදාටමත් පවතීවා……

උපාධිධාරියා

පහුගිය දවස් ටිකේ මොකක්දෝ හින්ද ඕනෙ තරම් කාලය තිබුනට බ්ලොග් එකේ ලිපියක් දාන්න  mood එකක් තිබුනෙ නැහැ; අපේ සහෝදර බ්ලොග්කරුවො ලියපු ඒවනම් ගොඩක් කියෙව්ව. ඒත් පහු ගිය දවසක මගෙ යාළුවෙක් මූණුපොතේ පළකරල තිබුණ ඡායාරූප ටිකයි ඒ ඡායාරූප එකතුවට කට්ටිය දාල තිබුණ  comments ටිකයි දැක්කම මාසෙකට ආසන්න කාලයක් තිබුන බ්ලොග් ලිවීමේ නිහැඬියාව බිඳින්න හිතුන. මේ මාතෘකාව මීට ඉස්සරත් මම “සරුංගලේ”කියන ලිපියෙන් ටිකක් දුරට සාකච්ඡා කලා.

එක අවුරුද්දකට අපේ විශ්වවිද්‍යාල වලින් ඉතා විශාල  උපාධිධාරීන් සංඛ්‍යාවක් සමාජයට පිටත් වෙලා යනව. ඔය උපාධිධාරීන් බොහොමයකගෙ අපේක්ෂාව ඕස්ට්‍රේලියාව, නවසීලන්තය වගේ රටක ස්ථීර පදිංචිය ලබාගෙන පිටත් වෙලා ගිහින් තම තමුන්ගේ පෞද්ගලික ජීවිත සාර්ථක කරගන්න. ඒත් ඔය අතරෙ ඉතාම අල්ප ප්‍රමාණයක් වෙච්ච පිරිසක් ඉන්නව මේ රටේ දියුණුව වෙනුවෙන් තමුන් ඉගෙන ගත්තු දැනුම පාවිච්චි කරන. ඒත් දැනට තියෙන සමාජ ක්‍රමය යටතේ වංචාව, දූෂණය වගේ දේවල් ඉදිරියේ නැමෙන්නෙ නැතුව කොන්ද කෙලින් තියාගෙන වැඩ කරන්න  ඉතා හොඳ ආත්ම ශක්තියක් ඕනෙ වෙනව. ගොඩක් උදවියට වෙන්නෙ මේ ආත්ම ශක්තිය නැති හින්ද පවතින සමාජ ක්‍රමයෙන් ඒ අයව ගිල ගන්න එක. ඉතාමත් අල්ප ප්‍රමාණයක් වෙච්ච උදවිය කට්ටියක් තමයි ඔය සටන ජයගන්නෙ.

මෙහෙම අපේ රටේ දියුණුව වෙනුවෙන් නිහඬ සේවයක් කරන ඔය වගේ අය කීයෙන් කීදෙනාද නිසි ඇගයීමකට ලක්වෙන්නෙ?

ඇවිල්ල ඇවිල්ලා චීන අවුරුද්ද ඇවිල්ලා….

චීන අවුරුදු සැරසිලි

සිංගප්පූරුවෙ ඉන්න අපිට ඔන්න පොඩ්ඩක් නිවාඩු පාඩුවෙ ඉන්න පුළුවන් දවස් ටික ළඟ ළඟම එනව. ඒ චීන අළුත් අවුරුද්දට ලැබෙන නිවාඩු ටික නිසා. එක අවුරුද්දකට සාමාන්‍යයෙන් සිංගප්පූරුවෙ තියෙන්නෙ නිවාඩු දවස් 11ක් වගේ. ඔය දවස් 11න් 2ක්ම චීන අළුත් අවුරුද්දට වෙන කරල තියෙන්නෙ. අපි අප්‍රේල් මාසෙදි අපේ අළුත් අවුරුද්ද සමරන විදිහටම තමයි මේ චීන ජාතිකයොත් එයාලගෙ අළුත් අවුරුද්ද සමරන්නෙ. ලෝකෙ වටේම විසිරිලා ඉන්න චීන ජාතිකයින් මේ අවුරුද්ද සමරනව. ඒත් චාරිත්‍ර වාරිත්‍ර නම් අපේ ඒවට වඩා ටිකක් වෙනස්. මමනම් මේ කාලෙට ගොඩක්ම කැමති මදි නොකියන්න පැණි දොඩම් හම්බවෙන හින්ද! ඒ වගේම තවත් නොයෙකුත් කෑම ජාති හම්බ වෙනව ඇති වෙනකම්.

චීන අවුරුදු තෑගි

මේ කාලෙට චීන ජාතිකයින් එයාලගෙ ගෙවල් ලස්සනට සරසනව. හරියට අපි වෙසක් කාලෙට කරනව වගේ. සැරසිලි වලට ගොඩක්ම යොදාගන්නෙ රතු, රත්තරන්, තැඹිලි, කහ කියන පාටවල් ටික තමයි. චීන ජාතිකයින් බහුතරයක් ඉන්න ප්‍රදේශ වල වීදි මේ කාලෙට සාම්ප්‍රදායික පහන් කූඩු වගේම විදුලි බුබුළුත් යොදගෙන ඉතාම ලස්සනට ආලෝකමත් කරල තියෙන්නෙ. අපි අළුත් අවුරුද්දට රතිඤ්ඤා, නිලා පත්තු කරනව වගේ මෙයාලත් ඒව කරනව. අනෙක ලෝකෙට වෙඩි බෙහෙත් දායාද කරපු චීන්නු එයාලගෙ අළුත් අවුරුද්දෙදි  ඒව පත්තු කරන්නෙ නැතිව ඉඳීද?

චීන විශ්වාසයට අනුව 2010 කියන්නෙ “කොටියට” අයිති අවුරුද්දක්! මේ අවුරුද්දෙදි විවාහ වෙන්න, ළමයි හදන්න වගේ දේවල් හොඳ නැහැ කියල තමයි එයාල විශ්වාස කරන්නෙ.

මේ තියෙන්නෙ ගිය අවුරුද්දෙ මැලේසියාවෙ මලක්කා නගරයෙ තිබුන චීන අවුරුදු ප්‍රසංගයකදි ගත්ත ඡායාරූපයක්

මෙන්න Safety

ලංකාවෙ වගේ නෙමෙයි අනෙක් ගොඩක් රටවල කර්මාන්තශාලා සහ වැඩ බිම් වලදි සේවකයින්ගෙ ආරක්ෂාව ගැන ගොඩක් සැලකිළිමත් වෙනව. ඒවගේම ගොඩක් තද නීති රීති එහෙමත් තියෙනව. සිංගප්පූරුවෙ තියෙන ඔය “සේවක වැඩබිම් ආරක්ෂාව” (Industrial Workers’ Safety) ගැන දැනුවත් කිරීමේ දේශනයකදි අපිට පෙන්නුව photo ටිකක් තමයි අද මේ post කරන්නෙ.

කොහොමද පින්තූර ටික? පිස්සු හැදෙනව නේද? ඇමරිකාවෙ New York නගරයේ Empire Estate කියන ගොඩනැගිල්ල හදන කාලෙ (1931දි විතර)  ගත්ත පින්තූර ටිකක් මේ! අරන් තියෙන්නෙ Lewis Wickes Hine කියන එක්කෙනා. මේ පින්තූර ටික ඒ දවස් වලදි ඇමරිකානු සමාජයේ ඇස් අවදි කරවන පින්තූර ටිකක් වෙලා. ඊට පස්සෙ තමයි ඔය “සේවක වැඩබිම් ආරක්ෂාව” කියන එක දිහාවට බලධාරීන්ගෙ ඇස් යොමු වෙලා තියෙන්නෙ.

පෑන් ගැසීම සහ අනෙකුත් ක්‍රීඩා

ඉස්කෝලෙ යන කාලෙ අපි ඉතින් බලාගෙන ඉන්නෙම  free period එකක් හම්බ වෙනකං නෙ! ඒකට එක එක හේතු තිබුන. ඔහොම තිබුන එක හේතුවක් තමයි “පෑන් ගහන්න” තිබුන පිස්සුව. සමතලා මතුපිටක් තියෙන desk එකක් හරි එහෙම desk දෙකක් එකට ළං කරගෙන හරි ඔන්න කට්ටිය පෑන් ගහන්න සෙට් වෙනව. එක පිලකට එක් කෙනෙක් හරි දෙන්නෙක් හරි සෙල්ලම් කරනව. අනෙක් පිලේ ඉන්න අයගෙ පෑන් තමුන්ගෙ පෑනෙන් ගහල desk එකෙන් බිමට වට්ටන්න ඕනෙ. පෑනට ගහන්න ඕනෙ කැරම් ගහනකොට disc එකක්ට ගහනව වගේ.

ඔය පෑන් ගහන පිස්සුව කට්ටියට කොච්චර තිබුනද කියනවනම් කට්ටිය පෑන් ගහන්නම විශේෂයෙන් පෑනුත් හදාගන්න පටන් ගත්ත. පෑනෙ බර වැඩි කරගන්න නොයෙකුත් විදි! සමහරු එක එක ලෝහ කෑලි පෑන ඇතුලට දානව; තවත් සමහරු විවිධ හැඩ තියෙන පෑන්! ඒක හරියට මලල ක්‍රීඩා වලදි කට්ටිය තහනම් උත්තේජක පාවිච්චි කරනව වගේ. ඒක නිසා game එකක් පටන්ගන්න ඉස්සෙල්ල කට්ටිය අනෙක් පිළේ අයගෙ “හොර වැඩ” හොයන්නත් පුරුදු වෙලා තිබුන. ඔයින් මෙයින් කොහොම කොහොම හරි පෑන් ගහන වැඩෙත් නැගල ගියා!

ඔය වගේ free periods වලදි කරපු තවත් නොයෙකුත් “සෙල්ලං” තිබුන. book cricket ගැහිල්ල, නයා දිගේ පෑන් යැවිල්ල වගේ නොයෙකුත් දේවල්.

ප.ලි.) ඔන්න මගේ කොත්තුව ලක්බිම පත්තරේ පළවෙලා! ආහ් තව එකක්! සිංගප්පූරුවෙ කොත්තු තියෙන තැනක් ගැන හෝඩුවාවක් හම්බවුනා. ගිහින් බලල විස්තර කියන්නම්.

Lemon Chicken

Lemon Chicken

ඔන්න ආපහු තවත් මැක්ස කෑමක්. මේ දවස්වල කෑම ගැනමයි ලියවෙන්නෙ. 😀 (හික්ස්) මේ Lemon Chicken කියන එකත් මම කන්න කැමති එකක්. ලංකාවෙදි අපි මස්, මාළු කන්නෙ මිරිස්, තුනපහ දාල නිසා සමහර කට්ටියට ඕව නැතුව කන්න බැහැ. ඒත් වෙනස් රසවලටත් පුරුදු වෙන්න පුළුවන්නම් හොඳයි.

Lemon Chicken වල රසත් මටනම් නියමෙට අල්ලල ගිහින් තියෙන්නෙ. ඒත් තවම හදන්න try එකක් දුන්නෙ නැහැ. ඒත් පුළුවන් වෙලාවක බලන්න ඕනෙ. මෙන්න recipe එක.

Previous Older Entries Next Newer Entries