සිංගප්පූරුවේ සීගිරිය..

දැන් ඉතින් ඉස්සර වගේ නෙමෙයි නොවැ. ඉඳල හිටල තමයි බ්ලොග් එකේ ලියන්නෙ. හැබැයි දවස ගානෙ අනෙක් අය ලියන ඒවනම් අඩුවක් නැතුව කියවනව. ඔය අල්ල පනල්ලෙ තමයි දැනගත්තෙ අපේ සහෲද බ්ලොග්කරුවෙක් වුන තම තම නැණ පමණින් ලියපු කුමුදු පින්තු මහතා අප අතරින් වෙන් වෙලා ගිහින් කියල. ඉතින් දියකැට පහණෙන් මමත් එතුමාට නිවන් සුව ප්‍රාර්ථනා කරනව.

 

Marina Bay Sands

Marina Bay Sands

 

ආපහු මාතෘකාවට එමු. ඔන්න දැන් සිංගප්පූරුවට එන කට්ටියට බලන්න යන්න තවත් අළුත් තැනක් තියෙනව. නම Marina Bay Sands. මේක integrated resort එකක්. ඒ කියන්නෙ නවාතැන් පහසුකම් තියෙන හෝටලයක් විතරක් නෙමෙයි සම්මන්ත්‍රණ ශාලා පරිශ්‍රයක්, කැසිනෝ , රාත්‍රී සමාජශාලා, අවන්හල්  වගේ තවත් ගොඩක් දේවල් තියෙනව. Marina Bay Sands අයිති වෙන්නෙ ඇමරිකාවෙ ලාස් වේගාස් මූලස්ථානය කරගත්ත Sands කියන කැසිනෝ සමූහයට. ආසියාව ගත්තහම Sands සමූහයේ චීනයෙ මැකාවෝ වලට පස්සෙ සිංගප්පූරුවෙ තමයි ශාඛාවක් තියෙන්නෙ.

Marina Bay Sands වල තියෙන ඒවගෙන් මැක්සම දේ තමයි කුළුණු 3කින් සහ තට්ටු 55කින් සමන්විත මේ ගොඩනැගිල්ල උඩ තියෙන Sky Park එක. සිංහලෙන් ඕනෙනම් “අහස් උද්‍යානය” කියන්න පුළුවන්. මේක තියෙන්නෙ පොළොව මට්ටමේ ඉඳන් මීටර 200ක් උඩින්.

මේ Sky Park එකට ගියහම නවීන් සිංගප්පූරුවේ අංශක 360ක දර්ශනයක් බලාගන්න පුළුවන්. ඒ දර්ශනය ඇත්තටම නියම අත්දැකීමක්.

Sky Park Details
Marina Bay Sands SkyPark එක කොටස් කීපයකින් සමන්විත වෙනව. Public Observation Deck කියන්නෙ මහජනයාට ඇවිත්  සිංගප්පූරුවෙ Skyline එක බලාගන්න පුළුවන් නැරඹුම් ප්‍රදේශයක්. ඊට අමතරව මේකෙ Infinity Pool කියල මීටර 150ක් දිග පිහිණුම් තටාකයක් තියෙනව. මේ පිහිණුම් තටාකයෙ එක පැත්තක් හදල තියෙන්නෙ පිටින් බැලුවහම SkyPark එකේ කොණේම තියෙනව වගේ පේන්න. ඔය ක්‍රමේට කියන්නෙ Vanishing Edge ලු. ඒකනම් මරේ මරු. ඕව මේවට අමතරව තව පොඩි Sky Gargen එකතුත් එන කට්ටියට කන්න බොන්න ඕනෙ වුනොත් ආපනශාලා පහසුකම් එහෙමත් තියෙනව. හැබැයි ඉතින් ලෝකෙ මුල්ම අහස් උද්‍යානය හැදුවෙ ලංකාවෙ අය. (බැබිලෝනියාවෙ එල්ලෙන උද්‍යානයක් තිබ්බ කිව්වට සාක්ෂි නැහැනෙ ) ඒ ඉතින් අපේ සීගිරියනෙ.
සිංගප්පූරුවට ආපු වෙලාවක කට්ටිය මෙතනට නොවරදාවම යන්න. හැබැයි ඉතින් ඩොලර් 20ක ටිකට් එකක් ගන්න වෙනව. සිංගප්පූරුවෙ  MRT System එකේ Circle line එකේ තියෙන Promenade කියන station එකෙන් බැහැල විනාඩි 10ක් විතර ගමනකින් මෙතනට යන්න පුලුවන්. තව ටික කාලෙකින් North – South line එකේ Marina Bay කියන station එකෙනුත් එන්න පුළුවන් වෙයි මගෙ හිතේ. SkyPark එකට යන්න ටිකට් ගන්න තියෙන්නෙ Marina Bay Sands වල 3වෙනි කුළුණ යටින්. කට්ටිය එහෙනම් සිංගප්පූරුවෙ සීගිරියටත් ගිහින් බලන්නකො.

 

19 වසරකට පෙර – ගාමිණී කුලරත්න

හසලක වීරයා

හසලක වීරයා

ගොඩක් කාලෙකින් මොනවත් ලියන්න බැරි උනා. ඒත් අදනම් ලියන්නම ඕනෙ. ඒ අද දවසෙ තියෙන ලොකු වැදගත්කමක් නිසා.

හරියටම අවුරුදු 19කට ඉස්සර අද වගේ දවසක ඉතා ශ්‍රේෂ්ඨ ලංකා පුත්‍රයෙක් ලාංකීය ජාතියේ තියෙන නිර්භීතභාවය මොනවට පෙන්නමින් ජාතිය වෙනුවෙන් තමුන්ගෙ ජීවිතය පරිත්‍යාග කලා.

මහනුවරට ආසන්න කුඩා නගරයක් වන හසලක ලංකාව  ඇතුළත විතරක් නෙමෙයි මුළු ලෝකයම දැන් දන්නේ හසලක වීරයගෙ ගම හැටියට. හසලක වීරය කියන්නෙ කවුද කියල ඇහැව්වොත් ඒ වීරයගෙ නම කියන්න බැරි උනත් ඒ වීරය කරපු වීර ක්‍රියාව පොඩි ළමයි පවා දන්නව.

එදා අලිමංකඩ හමුදා කඳවුරත් කඳවුරේ සිටින සහෝදර සෙබළුත් බේරා ගන්න තමුන්ගෙ ජීවිතය පූජා කලේ කොයි කවුරුත් හසලක වීරය කියල කියන කෝප්‍රල් ගාමිණී කුලරත්න PWV රණ විරුව. ඒ උතුම් පරිත්‍යාගය වෙනුවෙන් එතෙක් මෙතෙක් ශ්‍රී ලාංකීය රණ විරුවෙකු වෙනුවෙන් පිරිනමන උසස්ම සාංග්‍රාමික පදක්කම වෙන පරම වීර විභූෂණයෙන් මුළින්ම පිදුම් ලැබුව; ඒ 1991 ඔක්තොම්බර් 10 වෙනිද එවකට ජනාධිපති වෙලා හිටපු ප්‍රේමදාස ජනාධිපතිතුමා විසින්.

නූතන ජාතික වීර පරපුරක අමරණීය සටහනක් තැබූ මේ ශ්‍රී ලාංකීය රණ විරුවාට දිය කැට පහණේ උත්තමාචාරය මෙසේ පිරිනැමෙන වගයි.

ප.ලි.) සුප්‍රකට Reader’s Digest සඟරාවේ හසලක වීරයා ගැන පළවූ ලිපියක සිංහල පරිවර්තනය මෙතැනින් කියවන්න.

සිංගප්පූරුවට ගිහින් “උබින්” යමු!

එක පාරටම කට්ටිය බලයි type කරනකොට වැරදිලාවත්ද කියල. නැහැ. ඒ “උබින්” තමයි. මේ ලිපිය ලියන්න මම හිතාගෙන හිටියෙ මීට මාස 10කට 11කට විතර කළින්. ඒත් කොහොම කොහොම හරි ලියන එක පරක්කු උනා.

“උබින්” කියන්නෙ සිංගප්පූරුවට අයිති වෙන වපසරිය වර්ග කිලෝමීටර 10ක් විතර වෙන කුඩා දූපතක්. සිංගප්පූරුවෙ අය මේ දූපතට කියන්නෙ “පුලව් උබින්” කියල. මැලේ භාෂාවෙන් “උබින්” කියන්නෙ කළුගල් වලට; “පුලව්” කියන්නෙ දූපත කියන එකට. එතකොට නමේ තේරුම වෙන්නෙ “කළුගල් දූපත” කියල; නමේ තේරුම හැටියටම ඉස්සර මේ දූපත කළුගල් වලට ගොඩක් ප්‍රසිද්ධ වෙලා තියෙනව. එහෙම කළුගල් කඩල පස්සෙ කාලෙක අත ඇරල දාපු “ගල් කොරි” කීපයක්ම දූපතේ තියෙනව.

උබින් දූපත

සිංගප්පූරුව කිව්වහම කට්ටියට මතකයට එන්නෙ ඉතාමත් දියුණු දූපත් රාජ්‍යයක්නෙ. ඒ රට ඇතුළෙදි උබින් දූපත වැදගත් වෙන්නෙ තවමත් නාගරීකරණය කරපු නැති ඉතාමත් ග්‍රාමීය පරිසරයක් තියෙන ප්‍රදේශයක් විදිහට. උබින් දූපතට ගියහම දැනෙන්නෙ හරියට ලංකාවෙ ගමකට ගියා වගේ. ටික වෙලාවකට හරි කොන්ක්‍රීට් වනාන්තරයෙන් මිදිල ඇත්තම ග්‍රාමීය පහස විඳින්න ලැබෙන එක කියල නිමකරන්න බැරි සහනයක්. භූමිය කියන දේ ඉතාමත්ම හිඟ, ඒ වගේම වටින සිංගප්පූරුව මේ උබින් කියන දූපත තවම ඉඳුල් කරන්නෙ නැතුව තියාගෙන ඉන්නව.

මීට අවුරුදු ගානකට කළින් කොරළ් පරයක් වෙලා තිබුන ප්‍රදේශයකුත් මේ දූපතේ තියෙනව. ඊට අමතරව පොඩි වගුරු බිමක් එහෙමත් තියෙනව. අපේ ලංකාවෙ හික්කඩුව, මුතුරාජවෙල ගිහින් තියෙන අයට නම් හිතෙයි මේ මොනවද කියල. ඒත් මෙහෙ කට්ටිය ඒ අයට තියෙන දේ උපරිමයෙන් පරිස්සම් කරනව; ඒ වගේම හොඳට market කරනව.

ඔය මොනව තිබුණත් අපි නම් උබින් යන්නේ ඕව බලන්න නෙමෙයි. අපි යන්නෙ රඹුටන් කන්න! උබින් දූපත කියන්නෙ තවමත් අත ගහපු නැති කැළෑ රොදවල් තියෙන දූපතක්; ඒ වගේම සිංගප්පූරුවෙ ජාතික උද්‍යානයක්. උද්‍යානයක් කෙසේ වෙතත් පළතුරු වත්තක්! ඔය කැළෑ රොදවල් වල රඹුටන්, ගඩි ගුඩා, දූරියන් වගේ පළතුරු ගස් තියෙනව. වාරෙට ගියොත් ඇති වෙනකම් කන්න පුළුවන්. හැමදේකටම වගේ සල්ලි ගෙවන්න ඕනෙ සිංගප්පූරුවෙ හිතේ හැටියට පළතුරක් නොමිළේ කන්න පුළුවන් කියන එකත් ඇතිනෙ.

උබින් රඹුටන්

දැන් ඉතින් යන හැටි. සිංගප්පූරුවට ආපු වෙලාවක මෙහෙ යන්න හිතාගෙන ඉන්නවනම් සම්පූර්ණ දවසක් වෙන් කරන්න ඕනෙ. පළතුරු වාරෙ වෙන ජුලි, අගෝස්තු යනවනම් තමයි හොඳ. උබින් දූපතට යන්න ඕනෙ බෝට්ටුවෙ; උබින් යන්න බෝට්ටු සේවයක් “Changi Village” කියන තැනින් තියෙනව. තමන් නැවතිලා ඉන්න තැන ඉඳන් මේ Changi Village කියන තැනට එන්න ඕනෙ විදිහ මේ වෙබ් අඩවියෙන් තමුන් ඉන්න තැන ලිපිනයයි යන්න ඕනෙ තැන හැටියට Changi Village කියලයි දුන්නහම බලාගන්න පුළුවන්.

දූපත ඇතුලෙ ප්‍රවාහන මාධ්‍යය වෙන්නෙ දුප්පත් අපගේ බයිසිකලේ තමයි. බයිසිකලයක් තමුන් එනකොට අරගෙන එන්න පුළුවන්; එහෙම නැත්නම් බයිසිකලයක් කුළියට ගන්න පුළුවන් තැන් ඕනෙ තරම් බෝට්ටුවෙන් දූපතට ගොඩ බහින තැන තියෙනව. හැබැයි ගාණ ටිකක් වැඩි උනාට කමක් නැහැ සීට් එක හොඳ බයිසිකලයක් ගන්න! අත්දැකීමෙන් කියන්නෙ. මුළු දවසක්ම පදින්න ඕනෙ.

එක දවසකට වඩා ගතකරන්න ඕනෙ කට්ටිය ඉන්නවනම් කූඩාරම් ගහගෙන රැයක් ගත කරන්න පුළුවන් Camp sites එහෙමත් තියෙනව. කවුරු හරි කූඩාරම් ගහගෙන දින කීපයක් ඉන්න බලාපොරොත්තු වෙනවනම් අවශ්‍ය තොරතුරු බෝට්ටුවෙන් දූපතට ගොඩවෙන තැන තියෙන “සිංගප්පූරු ජාතික උද්‍යාන” තොරතුරු කුටියෙන් ලබාගන්න පුළුවන්. ඒ වගේම තමයි ඒ අය එතැනම ළඟින් තියෙන පොලිස් මුරපොලට දැනුම් දෙන්නත් ඕනෙ.

එහෙනම් සිංගප්පූරු ආපු වෙලාවක කට්ටිය “උබින්” යන්න බලන්න.

තේ

අප්පෝ හෙණ කාලෙකින්නෙ බ්ලොග් එක පැත්තෙ ඇවිල්ල තියෙන්නෙ. ලියන්න මාතෘකා තිබුනත් ලියන්න එච්චර ගෝ එකක් නැහැ වගේ. ඒත් ඉතින් අපේ කට්ටිය ලියන ඒවනම් මග අරින්නෙ නැතුව කියවනව.

Teh Tarik හදන හැටි

ඔන්න කාලෙකට පස්සෙ ලියන්නෙ බීමක් ගැන. තේ කිව්වහම ඉතින් ලංකාවෙ කවුරුත් දිනපතා බොන දෙයක්නෙ. සමහරුන්ටනම් දවසකට 3න් 4 වතාවක් තේ බොන්න ඕනෙනෙ.

ලංකාවෙ අපි බොන්නෙ එක්කො ප්ලේන් ටී, නැත්නම් ටී (කිරි තේ). ඔය අතරෙ ඉතින් ඉඟුරු දාල හදන ප්ලේන් ටීත් නැතුවම නෙමෙයි. ඔරිජිනල් තේ; ඒ කියන්නෙ ප්ලේන් ටී වලට “ප්ලේන්” කියල විශේෂණයක් දාන්නෙත් කිරි තේ වලට නිකම්ම නිකං “ටී” කියන්නෙත් ඇයි කියන එක මට පොඩි කාලෙ ඉඳන් තියෙන ප්‍රශ්නයක්! තවමත් ඒකට උත්තරේ දන්නෙ නැහැ. (දන්න කෙනෙක් ඉන්නවනම් කියන්න)

මැලේ භාෂාවෙන් අපි ප්ලේන් ටී කියන සීනි විතරක් දාල හදන තේ වලට කියන්නෙ තේ-ඕ ( teh-o) කියල. හොඳට පෙණ එන්න කීප පාරක් යාරයක් දෙකක් ඇදල හදන කිරි තේ වලට කියන්නෙ තේ-තරික් ( teh-tarik ) කියල. ( මැලේ භාෂාවෙන් tarik කියන්නෙ  අදිනවට ) හරියට ලංකාවෙ සරුවත් හදනව වගේ. මම අහල තියෙන විදිහට ලංකාවෙ දිගම සරුවත් දාන්නේ ඉස්සර යාපනේ හිටපු සරුවත් හදපු කට්ටියලු!

Green Tea

ඔය වර්ග ඔක්කොම හදන්නේ Black Tea කියල කියන කළු තේ වලින්නෙ. ඔය Black Tea වලට අමතරව Green Tea (කොළ තේ), Yellow Tea (කහ තේ), White Tea  (සුදු තේ) කියල එක එක වර්ග වල තේ තියෙනව. ඒත් මම දන්න විදිහට Black Tea වලින් දාන සෙල්ලං ඔය අනෙක් තේ වලින් දාන්න බැහැ. Green Tea වලට පිළිකා හැදෙන එක නවත්තන්න පුළුවන් කියල කියමනක් තියෙනව අහල තියෙනව. මම ඉස්සෙල්ල වැඩ කරපු තැනක මැනේජර් කෙනෙක් බිව්වෙම Green Tea; ඒ ශරීර සෞඛ්‍යයට හොඳයි කියල. ඒත් හිනා යන දේ තමයි මිනිහ දවසකට සිගරට් පැකට් 1 1/2ක් විතර බොනව.

චීන Jasmine Tea

ඔය කිව්ව වර්ග වලට අමතරව චීන ,ජපන් කට්ටිය අතර ජනප්‍රිය තව තේ වර්ගයක් තියෙනව  Jasmine Tea කියල. දන්න විදිහට නම් Jasmine Tea කියන්නෙ Green Tea වලට සමන්පිච්ච මල් කුඩු දාල තමයි තියෙන්නෙ. Jasmine Tea එකක් හැදුවහම පැත්තම සුවඳයි; හැබැයි මම දවසක්  try කරල බැළුව කටේ තියන්නවත් බැහැ! මට ඒ රස එච්චරම දිරවන්නෙ නැහැ.

තේ කිව්වහම එක පාරටම අපිට මතක් වෙන්නෙ තේ කුඩු නෙ. හැබැයි ලෝකෙට තේ බොන එක හඳුන්වල දුන්නයි කියල විශ්වාස කරන චීන අය තේ  compress (සම්පීඩනය) කරල තේ කැට හදනව. බොන්න ඕනෙ උනහම සුප් කැට වලින් සුප් හදනව වගේ උණු වතුර එකකට දාල බොනව. චීන්නුන්ගෙ තේ වර්ග ගොඩක් තියෙනව. උපාධියක් ගන්න තරම් ඉගෙන ගන්න දේවල් චීන තේ ගැන තියෙනව. ගොඩක් චීන අය සීනි, අරව මේව මොනවත් දාන්නෙ නැතුව නිකම්ම නිකන් තේ විතරක් බොන්නත් පුරුදු වෙලා තියෙනව.

Ice Lemon Tea

සිංගප්පූරුවට ආවට පස්සෙ මම බොන්න පුරුදු වෙච්ච දෙයක් තමයි  Ice Lemon Tea කියන්නෙ. සාමාන්‍යයෙන් අපි හදන ප්ලේන් ටී එකට ලෙමන් යුෂ ටිකක් මිශ්‍ර කරල ශීතකරණයෙ දාල තියල පිලිගන්වනකොට අයිස් කැට ටිකක් දාල පිළිගැන්නුවහම ඒක Ice Lemon Tea! ඕකෙම තවත් version ටිකක් තියෙනව Ice Peach Tea, Ice Apple Tea කියල. ඔය කියන ඒවත් Ice Lemon Tea වගේමයි. වෙනස මිශ්‍ර කරන පළතුරු යුෂ වර්ගය මොකක්ද කියන එකයි.

රටින් රටට වෙස් මාරු කරන “අලි බබා”!

අලි බබා කිව්වහම කට්ටියට එක පාරටම මතකයට එන්නෙ “අලි බබා සහ හොරු හතලිහ” නේද? ඉරාකයේ බැග්ඩෑඩ් නගරය කේන්ද්‍ර කරගෙන ලියවිච්ච මේ අරබි කතාව සමහරුන්ට අනුව නම් සුප්‍රසිද්ධ අරාබි නිසොල්ලාසයෙ එන කතාවක්. සමහරුන්ට නම් පොඩි ලමයින්ට කියල දෙන නිකංම නිකං අරාබි කතාවක්. ඒ කොහොම උනත් කතාවල හැටියට නම් අලි බබා කියන්නෙ මිනිහෙක්නෙ.

අරාබි කතාවල එහෙම උනාට ලංකාවෙදි සත්තු වත්ත, පින්නවල අලි අනාථාගාරය, උඩවලවෙ ඇත් අතුරු සෙවන වගෙ තැන් වලට පොඩි ළමයින්ව එක්කගෙන ගියහම අලි බබාල ගොඩක් පෙන්නල එන්න පුළුවන්!

ඔය “අලි බබා” සිංගප්පූරුවට ආවහම නම් අමු හොරෙක් වෙනව! සිංගප්පූරුවෙ කට්ටිය පාවිච්චි කරන  singlish වලින් “අලි බබා” කියන්නෙ හොරාට, එහෙම නැත්නම් කට්ට කෛරාටික එක්කෙනෙක්ට.

පසු ලිවීම :- අන්තර්ජාලයෙ ඉන්න අලි බබා නම් නොයෙකුත් බඩු විකුණන online – තැරව්කාරයෙක්!

සිංගප්පූරුවේ “දත් ගැලවිල්ල”!

ඔන්න ආපහු කාලෙකට පස්සෙ බ්ලොග් එක පැත්තෙ ආව.
මේක මට ඊයෙ වෙච්ච සිද්ධියක්.

දත් දොස්තරල කියනව වගේ දවසකට දෙපාරක් දත් මදින හින්දත්, හැම දතකටම ලේසියෙන් ලඟාවෙන්න පුළුවන් නැමි 3නේ දත් බුරුසුවක් පාවිච්චි කරන හින්දත්, ෆ්ලෝරයිඩ් සහ කරාබු නැටි තෙල් තියෙන දන්තාලේපයක් පාවිච්චි කරන හින්දත් ඔන්න මගෙ දතක් “පණුවො කෑව”.

ටික දවසක් ඉවසල ඉන්න බැරි තැන ඊයෙ නිවාඩුවක් දාල මම ගියා සිංගප්පූරුවේ දත් දොස්තර කෙනෙක් මුණ ගැහෙන්න. මෙහෙ ඉතින් ඕනෙ දෙයක “කැටයම” තියෙනවනෙ. Dental Clinic එක Full AC! ගිය ගමන් දුන්න form එකක් ඉපදිච්ච වෙලාවෙ ඉඳන් සෞඛ්‍ය ඉතිහාසය අහල. ඒකත් පිරෙව්ව කියමුකො.

ටික වෙලාවකින් දොස්තර කතා කලා. ඇතුලට ගියහම වාඩි වෙන්න කියල ඇහුව මොකක්ද ප්‍රශ්නෙ කියල. මමත් කිව්ව මෙන්න මෙහෙමයි; මට හිතෙන විදිහට මගෙ දකුණු හක්කෙ උඩු ඇන්දෙ දතක් දිරල කියල. දොස්තර කිව්ව මුලින්ම X-ray එකක් අරගෙන බලමු කියල. ඒකට ඩොලර් 20ක් යනවලු. ඉතින් මමත් “හා” කිව්ව. හා කිව්වට ඉතින් හිත නිකන් exchange control center එකක් වගේ පට පට ගාල ඩොලර් රුපියල් වලට හරවනව. ඩොලර් 20 ක් කියන්නෙ රුපියල් 1600ක් විතර. ඒත් ඉතින් මොනව කොරන්නද? මේ සිංගප්පූරුවනෙ! X-ray එක ගත්තට පස්සෙ ඒක බලල කියනව normal filling එකකින් වැඩේ ගොඩ දාගන්න පුළුවන් වෙයි වගේ කියල. ඒකට ඩොලර් 60යි! (රුපියල් වලින් 4800ක් විතර ) ඇති ඔයින් බේරුනොත්!

ඔන්න ඉතින් දත පුරවන්න පටන් ගත්ත. ටික වෙලාවකින් දොස්තර කියනව දතේ දිරුම ගොඩක් ඇතුලට තියෙනව එක්කො nerve filling එකක් කරන්න ඕනෙ, නැත්නම් දත ගලවන්න ඕනෙ කියල. දැන් ඉතින් මක්කැයි කොරන්නෙ?

දත ගලවනවනම් යන්නෙ ඩොලර් 30යි ලු. ඒත් දත ගොඩ දාගන්න පුළුවන් තත්ත්වයෙ එකක් හින්ද එයානම් කියන්නෙ nerve filling එකක් කරගන්න කියලලු. හැබැයි ඒකට ඩොලර් 600ක් විතරලු, ඊට පස්සෙ තව crowning කියල එකක් කොරන්න තව ඩොලර් 500ක් විතර යනවලු.

දැන් දොස්තර කියනව හිතල බලල කියන්නලු මොකක්ද කරන්නෙ කියල. මිනිහ මාව මාර උගුලක තමයි දැම්මෙ! ගොඩ දාගන්න පුලුවන් දතක් හින්ද ගලවන්නත් ලෝබයි; ඒත් ඉතින් ඩොලර් 1100ක් දතකට වියදම් කරන්න?

ඔය වෙලාවෙ ඉතින් පූරුවෙ වාසනාවකට maxa idea එකක් ආව. මම කිව්ව මම ආපහු ලංකාවට යනව; ලංකාවෙ nerve filling එකක් කරන්න උපරිම යන්නෙ ඩොලර් 100ක් විතර; ඒක නිසා ඒ වෙනකම් මට  temporary filling එකක් දාල දෙන්න කියල. වැඩේ ගොඩ!

දොස්තරත් ඉතින් (බැහැ කියන්න බැරි නිසා) “හා” කියල දත පුරවල දුන්න. 😀 කොහොම හරි අන්තිමට ඔක්කෝටම ඩොලර් 90ක් විතර ගියා. ඔයින් ගියා ඇති. උන්න හැටියට මළා මදැයි!

Full අබ්ලික් වෙච්ච වෙලාවෙ අරවගේ idea එකක් ආව එකට දහස්වාරයක් ස්තූති කර කර මමත් ආපහු ආව.

ඔන්න ඔහොමයි සිංගප්පූරුවෙ “දත් ගැලවිල්ල”!

Raat Kali Ek Khwaab Mein Aayi – සිහිනයකදී සමන් කැකුලක්ව පැමිණ

බ්ලොග් එක පැත්තෙ ආවෙ ගොඩ කාලෙකින්. ලියන්න මාතෘකා කීපයක් හිතට ආවත් හිතට එච්චර ෆිට් එකක් තිබුනෙ නැහැ. ඒත් අපේ කට්ටියගෙ බ්ලොග් ටික නම් කියෙව්ව. ඒ අතරෙ ඕන් කට්ටිය බ්ලොග් මැරතන් එකකුත් ලෑස්ති කරල කියන්නෙ. මගෙත් idea එකක් තියෙනව ඕකට සෙට් වෙන්න. බලමු ඉතින් එන හැටියට තමයි.

දැන් මාතෘකාවට බහිමු. මාතෘකාවෙ තියෙන්නෙ මම ගොඩක්ම කැමති හින්දි සිංදුවක්. මේක 1971 දි තිරගත වුනු Buddha Mil Gaya කියන හින්දි චිත්‍රපටියට මුලින්ම ගායනා කරල තියෙන්නෙ අග්‍රගණ්‍ය ගායකයෙක් වෙච්ච කිශෝර් කුමාර්; මුල් ගීතය වෙච්ච මේක රචනා කරල තියෙන්නෙ මජ්රු සුල්තාන්පුරි; සංගීතවත් කරල තියෙන්නෙ රාහුල් දේව් බර්මාන්.

ඊට පස්සෙ මේ සිංදුවෙ 2nd Version එක 2002 දි Dil Vil Pyaar Vyaar කියන හින්දි චිත්‍රපටියට කුමාර් සානු ගායනා කරනව.

ඊටත් පස්සෙ ඉන්දියාවෙ දැනට ඉන්න radical විදිහට පරණ සිංදු re-mix කරන music band එකක් වෙන Instant Karma කියන අය 2006 දි මේ සිංදුවෙ මෙච්චර කාලෙකට ආව හොඳම version එක ඒ අයගෙ 4 වෙනි album එක වෙන Dance Masti Forever කියන album එකේදි Raat Kali – The Midnight Lady Mix කියල එළියට දෙනව.

අමාරුවෙන් අමාරුවෙන් මේ සිංදුවෙ තේරුමත් ගැටගහගත්ත ඕං…

(ඈ) සිහිනයකදී සමන් කැකුලක්ව පැමිණ පසුව මල් මාලයක් විය,
පසුදා හිමිදිරියේදි සිහිනෙන් අවදිවත්ම ඇගේ නෙත් මගේ නෙත් හා යාවිය.

ඔබට කැමතිනම් මෙය මගේ ආදරයයැයි වටහාගන්න, නැත්නම් එයට හිනා වෙන්න; එයට කම් නැත.
මට මේ කුමක් වී ඇත්දැයි වටහා ගැනීමට නොහැක; ඔබටවත් වැටහෙන්නේනම් කරුණාකර මට පවසන්න.
මේ දෙරණ මත ඔබ තබන පියවරක් පියවරක් පාසා මගේ හදවත සලිත වෙන්නේ ඇයි?

අඳුන් ගැල්වූ ඔබේ නෙතු සඟල මට හැඟෙන්නේ මේඝ වලාවක් මෙනි,
රන්වන් පැහැ ගැන්වුනු ඔබේ මුහුණ උදෑසන  හිරු කිරණ මෙන් ප්‍රබෝධමත්ය.
ඔබේ ඔය වත කමල මගේ හදවතේ පිපුණ දා සිට මසිත අලංකාර මල් යායක් වී සුවඳ හමයි..

කොතෙකුත් සුන්දර ලලනාවන් මා දැක ඇතිමුත් ඔබගේ රූපශ්‍රීය හමුවේ ඔවුන් පරාදය.
මගේ දෑත් යුගල මතට ඔබව රැගෙන යෑම එක වරක් නොව කීපවාරක් මා දුටු සිහිනයකි.

(ඈ) සිහිනයකදී සමන් කැකුලක්ව පැමිණ පසුව මල් මාලයක් විය……….

එහෙනම් කට්ටිය සිංදුවෙ Version 3 ම අහමු!

මෙන්න Original Version

මෙන්න 2nd Version

මෙන්න මම කැමතිම 3rd Version එක

Previous Older Entries Next Newer Entries